Soňky habarlar

Dewisiň kubogy 2021

Dewisiň kubogy ugrundaky ýaryşyň saýlama tapgyry Aşgabatda geçer

2021-nji ýylda tennis boýunça Dewisiň kubogy ugrundaky ýaryşyň Aziýa boýunça saýlama tapgyry Aşgabatda geçer. Şunuň ýaly abraýly halkara ýaryşynyň geçirilmegi üçin birnäçe şäherleriň arasyndan Aşgabadyň saýlanyp alynmagy türkmen paýtagtynyň dünýä sportunda uly abraýdan peýdalanýandygynyň aýdyň görkezijisidir. 

Dewisiň kubogy ugrundaky ýaryş dünýäniň iň güýçli tennisçilerini özünde jemleýän iňňän uly meşhurlyga eýe bolan ýaryşdyr. Onuň saýlama tapgyrynyň oýunlarynyň Aşgabatda geçirilmegi bolsa ýurdumyzdaky tennis muşdaklarynyň sanynyň hasam artmagyna getirer. 

Ýurdumyzda dünýä sportunyň ösen derejesiniň talaplaryna doly jogap berýän döwrebap binalaryň gurlup ulanylmaga berilmegi bilen ýurdumyz sebit boýunça iri halkara ýaryşlarynyň yzygiderli geçirilýän merkezine öwrüldi. 

Tennis boýunça Aziýa döwletleriniň arasynda Dewisiň kubogyny almak ugrundaky ýaryşyň üstünlikli geçirilmegi bolsa sportuň dürli görnüşleri boýunça iri halkara ýaryşlaryny geçirmek üçin ýurdumyzyň paýtagty Aşgabady saýlap almaga bolan islegi hasam artdyrar.